تدوينة مؤثرة وتهديدية لأمين نصرو الله بعد التشطيب عليه في المحاماة

نشر المحامي الشاب امين نصرو الله الذي قامت هيئة المحامين بالدار البيضاء بالتشطيب عليه مع النفاذ المعجل بسب تهم تخص القيام بأعمال دنيئة تدوينة مؤثرة عبر حسابه فيسبوك.

وقال نصرو الله في تدوينته ” متعب جدا وعياااان نفسيا وذهنيا.
بعض المعارك في الحياة كندخلو ليهم ماشي حبا أو اختيارا، ولكن كنكونو مضطرين حقاش مكينش حل آخر.

الحمد لله هد السنين الأخيرة دازت عندي شويا قاسحة (ربما من ضعفي وتعبي) ولكن الله اجعلها مغفرة للذنوب.

كرهت نهار لي درت فيه شعبة العلوم القانونية والنهار لي تعلقت فيه بالمحاماة، وكرهت نهار لي بديت كنقرا الكتوبة وننتيق الشعارات ونبدا حتى أما نحلم، غادي نوصل وعادي ندير ونفعل ووو….

كرهت نهار لي ناضلنا فيه في الجامعة، وكرهت سنين القراية والاجتهاد، كرهت النهار لؤ ناضلنا فيه حلى معركة امتحان المحاماة، كيفما أقسم بالله الى كاره راسي على هد المعركة لي محاملهاش ولكن معنديش حل آخر، حقاش تظلمت وصبرت وسكت وطلبت ودوينا مع ناس باش تدخل بالخيط الابيض والخير، ولكن التجييش والتشويه والشيطنة لها رأي آخر.

حقي غادي نموت عليه، قسما بالله حتى نموت عليه، وغادي نوصل قضيتي لأي جهة فهد البلاد، وعلى رأسهم جلالة الملك و ولي العهد ولمنظمات حقوقية وطنيا ودوليا وكلشي.
وإن اقتضى الأمر نفدي قضيتي بروحي باش ابان الحق، ونموت شهيد على حقي ضد الظلم.

عرفتي على أفكار كيجيوني في راسي، أقسم بالله الى مرعبة، لدرجة ممنوع نطفي التلفون وخاصني نبقى مخدم شي قصة في اليوتوب غير باش نسى الوسواس لي دخلني ويخليه نفكر شي أفكار كارثية.

حط راسك في بلاصتي، 33 سنة ديال التضحية والكفاااااح، وفي الأخير مني توصل الحلم ديالك كلك جراح وعذاب وتعب، بمجرد ما تحط رجلك في الحلم ديالك اقطعوها ليك، ظلما، حقاش بنادم قاطع ايدو من يد الرحمان.

تخيل أن حياتك لي ضحيتي عليها سنين، كلشي مشا وتبخر، وأنك وليتي لا شيء، يعني ماشي رجعتي لنقطة الصفر، وإنما بعد كاااع هد التضحية تغرق تحت الصفر، ظلما.

تعذبت، خصوصا من مرحلة معركة امتحان المحاماة إلى الآن.

كنت كنقرا العلوم الفيزيائية، 8 سنيييين ديال سوء الاختيار والقرارات الغالطة والنضال والحركة الطلابية، من بعد سير ا أمين قرا القانون وبعد من النضال. وفعلا داكشي لي كان.

قرا القانون وجيب المرتبة الأولى، ومن بعد صبر وسير كمل قرايتك وخا راك شرفتي، ولكن غير صبر وتكون حتى اخرج امتحان المحاماة ودير ماستر في رباط وبعد على واليديك والمصاريف.

تخيل أنك سافرتي سنيييين، وفي الأخير لقيتي أنك وصلتي للوجهة الخطأ

من بعد…
التشطيب مع النفاذ المعجل لأنه قام بأفعال حقيرة دنيئة خسيسة، وأنه وأنه وأنه دار ودار ودار ودار

وكلت عليكم الله.”

وكان مجلس هيئة المحامين بالدار البيضاء قد قرر شطب على أمين نصر الله، شهر يوليوز الماضي، إثر وقوع اشتباك بينه وبين زميل له داخل القاعة المخصصة للمحامين في المحكمة الابتدائية الزجرية عين السبع بالدار البيضاء